Enfressi a le cartre en sont molt tost venues,
U Mirabiaus gisoit dolante et irascue.
Eles l’en ont levee sor une kieute nue ;
Dusc’a la maistre sale sont arier revenues.
Qui veist ces puceles qui la crient et huent :
« Ahi ! nobile dame, » font eles, « com mar fustes !
« Tant par estiés gente, quant chi fustes venue ! »
Enfressi a l’ostel ne sont aresteues ;
En .i. lit le couchierent dont la kieute remuent.
Makaires li traitres de riens ne s’aseure :
De Losane trespasse toute[s] les maistres rues,
Vient sor le pont del Rosne, dedens l’aighe les rue.
Cele nuit i fist Dieus vertu apercheue :
Li Rones qui ert rades les enfans ne remue.
Terris ert soz le pont qui pescoit a la lune :
Ch’estoit .i. gentiex hon, de mal faire n’ot cure ;
Bien a oi Makaire venir par mi la rue ;
Il voit les .ii. enfans qui flotent sans aiue :
A ses .ii. mains les prent, belement les rem(e)ue,
Dedens la nef les met, si lor fait tel aiue
Sa cape et ses dras oste, de ses dras se desnue ;
Dedens met les enfans, si naga a droiture.
Ne vient pas que la noise soit par eus entendue :
Ançois s’en est tornés, de riens ne s’aseure,
A sa maison s’en va, si i vient a droiture.
Des or naga Terris, molt aime Dieu de gloire,
Tost vait a son ostel, les .ii. enfans emporte.
Sa mollier vient encontre, dame Aie de Monto(i)rie,
Droitement al rivage trés par mi une porte,
Si aporte en sa main une candoile torte.
Tieris li gentiex hon s’en vint a son ostel :
Il issi de la rive, si atacha sa nef.
