— Certes, » che dist Rainiers, « qui chou me porquerra
« Tous les jors de ma vie mes boins amis sera.
— Sire, » dist li traitres, « vo gent faites armer ;
« Une bele aventure vos sai dire et conter :
« Or ains par devant vespre, quant on le dut soner,
« Vinrent .vi. chevalier fervestu et armé
« Tout droit a [ma] maison pour requerre l’ostel.
« A grant mervelle estoient richement acesmé ;
« Li uns en fu Gerelmes de Mongraille li ber,
« Et tout si .iiii. fil de novel adoubé :
« Por un glouton conduire s’est en France avalé :
« Il a a non Aiol, ensi l’oi nomer,
« Si vient de Panpelune d’un mesage conter :
« Tel eskiec en amaine, ainques ne vi son per ;
« .vii. chevals qui de vair et de gris sont torsé
« Et d’or quit et d’argent, de deniers monaé[s],
« Et la fille le roi, Mirabel al vis cler,
« Que il a conquestee par sa nobileté.
« Je n’en savoie mot or ains a l’avesprer ;
« Quant jes oc herbergiés volentiers et de gré,
« Leus me dona .c. saus de denier monaé,
« Et ma feme un mantel qui riches est assés ;
« Et mes fieus de servir fu tous abandonés :
« Tost li fu ses serviches molt bien guerredonés,
« Car Aiols en fist leus chevalier adoubé(s)
« D’armes et de ceval corant et abrivé ;
« Li chevals vaut .c. livres c’Aiols li a doné.
« Quant eumes mangié et beu a plenté,
« Son non li demandai, ainc nel dainga celer.
« Or poés dire et croire, molt ai mon ceur iré,
« Quant dedens ma maison ai celui ostelé
« Qui mon signor pendi, que je deu(st) tant amer.
« Gentiex hom, del vengier te convenist aster.
— Certes, » che dist Rainiers, « Dieus en set mon pensé. »
A sa vois qu’il ot haute commencha a crier :
