« Que ja por vos avoirs en soit mençoinge dite :
« Je reprendrai les miens se Dex me donne vie.
« Mais departir convient la nostre compaignie. »
Dist Jobers et Ylaires, li gentiex et li ber :
« Gentiex hon de boin aire, mal baillis nos avés.
« Or dira Loeys et querra par vertés
« Que nos vous avrons mort, murdri et estranlé,
« Et pris par traison et as paiens livré(s).
— Signor, » che dist Aiol[s], « por nient en parlés,
« Que je ne le feroie por l’or de .x. chités :
« Je remanrai ichi et vos vous en irés. »
Dist Jobers et Ylaire[s] : « Sire, car en venés :
« Quant vos nel volés faire, nos n’en poons faire el. »
Atant s’en retornerent coureçous et iré.
Li dui baron s’en tornent cor(e)ços et abosmé
Isnelement ariere tout le chemin ferré :
Ils sorent bien la voie, car del pais sont né.
Tant ont par lor jornees exploitiet et esré
Qu’il vinrent a Orliens la mirable chité.
Li rois i tient sa court o son rice barné ;
Quant il les vit venir, si lor a demandé :
« Dites, signor, d’Aiol com estes dessevré ? »
Cil ont molt [boin le] ceur, ne le vaurent blamer,
Ains l’ont quanques il peuent essaucié et levé :
« Il est teus chevaliers onques ne fu ses pers ;
« .iiii. paiens ochist l’autre jor al jouster :
« Vés ent chi les chevaus qu’il nos en a donés,
« S’en aportons les testes que vos miex le creés.
« Mais a .i. gentil home l’a Jesu asené
« Qui doit faire une guerre en[con]tre .i. de ses pers ;
« Si est remés a lui del premier jor d’esté
« Tant qu’il ait son pais et son resne aquité,
« Puis vous venra servir volentiers et de gré. »
Quant l’entendi li rois, por poi qu’il n’est dervés :
« Fil a putain, glouton, ains le m’avés emblé,
« Et pris par traison et as paiens livré ! »
