Coragous et ardit por les armes baillier.
Ambedui laisent core, ne se vaurent targier,
Quanque chevaus peust rendre, des esperons d’or mier,
Cascun[s] feri le sien, ne l’a mie espargniet :
Onques toutes lor armes ne lor orent mestier
Que mors nes aient fait a tere trebuchier.
Huimais porés oir des .iii. frans escuiers :
Quant virent les .iii. mors, ainc ne furent si lié ;
Chele part sont venu esrant sans detrier,
Des ronchins dessendirent isnelement a pié,
Si lor ont les vers elmes des testes esraciés,
Si lor traient des dos les blancs aubers doubliers ;
Isnelement les vestent, s’ont les elmes lachiés,
Et çaingent les espees as brans forbi[s] d’achier,
Et pendent a leur caus les escus de quartier,
Puis laisent les roncins ens el pré estraier[s].
Si saillirent es seles des auferans corsiers :
Huimais seront il .vi. a l’estor commenchier.
Li .vii. furent el bos dolant et courechié :
Volentiers s’en fuissent, mais ne lor vaura nient,
Car il n’ont nul recet u puisent herbergier.
Fors del bos s’en issirent li quivert renoié :
Par proeche s’avalent li .iii. franc escuier,
Devant sor les escus fierent les .iii. premiers
Que çaingle ne poitral ne lor ot ainc mestier
Que par tere nes facent contreval trebuchier.
Et Aiols et Ylaires et Jobers li guerriers
Laissent core a eslais les boins corans destriers
Et vont ferir les .iii. es escus de quartier :
Desor les boucles d’or les ont frains et perciés,
Les haubers de lor dos desrous et desmailliés,
Et les fers et les fus lor font es cors baignier,
Com mors les trebuchierent el pendant d’un sentier.
« E Dieus, » che dist Aiols, « par ta sainte pitié,
« Com je sui richement de ces gloutons vengiés ! »
— 4792 ardis — 4795 esparengiet — 4811 Valentis — 4822 desront
