« Vos gastés ceste terre, n’i avés droit.
« Hui est venus li jors quel comperois.
— Sanses, » [ce] dist Aliaumes, « vien ent, je vois :
« Maleoit soit tex entes et ses bufois !
« Ha ! Dieus ! quel[s] chevaliers nous a tolois !
« Alon nous ent fuiant tant com nos loist. »
[Vont] Sanses et Aliaumes tornant les dos
Et Aiol[s] les encauche tous les galos :
Sa lanche a recovree en .i. des mors.
On blamoit Marchegai, mais il va tost ;
Il ot maigre le crupe et lons les os,
Les .iiii. piés coupés bien fais et gros :
Aiols le laise core par grant esfors.
Desor l’escu Sanson feri tel cop
Que il li a perchié l’auberc del dos ;
Sa grant anste li mist par mi le cors :
Devant lui a la tere l’abati mort.
Aliaumes s’enfui dessi al bos
Et Loeys l’encauche a son esfors ;
.vii. cens et .iiiixx. et quinse i ot
De noble[s] chevaliers as escu[s] fors,
Et puis la gent a pié quil sieut au dos.
Aliaumes s’en revait el bos fuiant,
Et Aiol[s] l’en encauche esperonant.
Il tient nue l’espee qui fu trenchant
Et vait ferir Aliaume en ataignant ;
Tel coup li a doné en trespassant
La teste en fist voler en mi le camp.
A tant es Loeys esperonnant ;
Les Beruiers trova el val gissant.
De maisnie sousprise n’en sai niant :
François les vont ferir de maintenant
Des lances qui sont roides as fers trenchans.
