Li lechieres fu fel et faus et bris.
Il est saillis en piés, devant lui vint ;
Le pan de son mantel se li tendi,
El puin destre li ploie, se li a dit :
« Sire, tenés mon gage, je me renc pris ;
« Si en ferés justiche a vo plaisir. »
Quant Aiol[s] l’entendi, s’en fu maris
Quant il set et entent qu’il l’escarnist :
Talent ot de l’espee l’alast ferir,
Quant li menbre del sens et des boins dis
Que Elies ses peres li avoit dit
El bois en Mongaiant quant s’en parti
Que li hon qui plus tenche plus est honi[s] :
Il rebati el feure le branc forbi :
« Amis, » che dist Aiols, « se Dex m’ait,
« Tu te jues a moi, jel sai de fit :
« Et je voil que tu dies tout ton plaisir ;
« Mais ovre cele porte, lai m’ent issir,
« Si sievrai le cembel que je vic chi.
« Se gaing palefroi ne boin ronchin,
« Baille cha ta main destre : je te plevi
« Que je te donrai tant al revenir,
« L’acordanche en ert faite a ton plaisir :
« Ne sui pas chevaliers de riche pris. »
Et respont li portier[s] : « Laisieme oir :
« Par la foi que vous doi, biau[s] dous amis,
« N’istra hui chevalier[s] de cheste chit.
« Remetés en l’estable vostre ronci ;
« Poi a mangiet avaine en cest avril.
« Vous feriés la fors le malfé vis :
« Cil qui bien sont armé et bien garni
« Ne lor poriés forfaire un Angevin. »
Quant Aiol[s] l’entendi, molt fu maris.
Or sist Aiol[s] li ber sor son destrier,
Desore Marchegai qu’il ot molt chier.
Le portier apela par amistié :
