Du siècle les mignons, fils de la poulle blanche,
Retiennent à leur gré la fortune en la manche :
En crédit eslevez ils disposent de tout,
Et n’entreprennent rien qu’ils n’en viennent à bout :
Mais quoi ! me diras-tu, il t’en faut autant faire ;
Qui ose a peu souvent la fortune contraire :
Importune le Louvre et de jour et de nuict :
Perds pour t’assujettir et la table et le lict :
Sois entrant, effronté ; et sans cesse importune :
En ce temps l’impudence esléve la fortune.
Il est vrai ; mais pourtant je ne suis point d’avis
De desgager mes jours pour les rendre asservis,
Et sous un nouvel astre aller, nouveau pilote,
Conduire en autre mer mon navire qui flotte
Entre l’espoir du bien, et la peur du danger
De froisser mon attente en ce bord estranger.
Car pour dire le vray, c’est un pays estrange,
Où comme un vrai Protée à toute heure on se change,
Où les loix, par respect sages humainement,
Confondent le loyer avecq' le chastiment ;
Et pour un mesme fait, de mesme intelligense,
L’un est justicié, l’autre aura récompence.
Car selon l’intérest, le crédit ou l’appui,
Le crime se condamne et s’absout aujourd’hui.
Page:Nerval - Choix des poésies de Ronsard, 1830.djvu/321
Le texte de cette page a été corrigé et est conforme au fac-similé.
