afin de ne rien obmettre de ce que tu pourrais désirer pour ton esclaircissement, il ne faut que déduire & expliquer deux mots de bonne foy, & ce avec la briefveté qui est requise à une Préface.
Le premier desquels t'advertira & te fera peut estre esmerveiller de ce que j'ay pris l'occasion de composer une si laborieuse Apologie sur une rencontre quasi de nulle conséquence. Tu sçais, comme je croy, que sur la fin du Quaresme dernier on publia un petit livre intitulé, Nouveau jugement de ce qui a esté dict & escrit pour & contre le livre de la Doctrine curieuse des beaux Esprits de ce temps : sur la fin duquel celuy qui en a esté l'Autheur a faict inserer deux invectives fort courtes & succinctes contre Homère & Virgile: pour quelle fin & avec combien peu de raison, ce n'est pas icy le lieu d'en discourir, mais tant y a que dans celle de Virgile il l'accuse d'avoir esté un indigne Enchanteur & Necromantien, & de ce qu'il avoit faict une infinité de choses esmerveillables par le moyen de la Magie. Ce que je recognus incontinent avoir esté transcrit mot pour mot du dernier livre que M. de Lancre a faict imprimer contre la mescreance du Sortilège : D'où venant à
