Page:Montaigne - Journal du Voyage en Italie, 1774, vol1.djvu/189

une certene odeur d’air qui vous frappe en entrant, le demurant c’est une chaleur douce & eguale. M. de Montaigne, qui couchoit dans un poile, s’en louoit fort, & de santir toute la nuit une tiedeur d’air plaisante & moderée. Au moins on ne s’y brûle ny le visage ny les botes, & est on quitte des fumées de France. Aussi là, où nous prenons nos robes de chambre chaudes & fourrées entrant au logis, eus au rebours se mettent en pourpoint, & se tiennent la teste descouverte au poile, & s’habillent chaudement pour se remettre à l’air. Le jeudy il but de mesme ; son eau fit opération & par devant & par derriere, & vuidoit du sable non en grande quantité ; & mesme il les trouva plus actives que autres qu’il eust essayées, soit la force de l’eau, ou que son corps fût ainsi disposé, & si en beuvoit moins qu’il n’avoit faict de nulles autres, & ne