Eſprenei[1], cinq lieues. Où eſtant arrivés, MM. d’Eſtiffac & de Montaigne s’en allarent à la meſſe, comme c’eſtoit leur coutume, en l’egliſe Noſtre Dame ; & parce que ledit ſeigr. de Montaigne avoit veu autrefois, & lorſque M. le mareſchal de Stroſſi fut tué au ſiege de Teonville[2], qu’on avoit apporté ſon corps en laditte egliſe, il s’enquit de ſa ſepulture, & trouva qu’il y eſtoit enterré ſans aucune montre ny de pierre, ny d’armoirie, ny d’epitaphe, vis a vis du grand autel ; & nous fut dit que la reine l’avoit ainſi faict enterrer ſans pompe & cérémonie, parce que c’eſtoit la volonté dudit mareſchal. L’eveſque de Renes de la maiſon des Hanequins à Paris, faiſoit lors l’office en laditte egliſe de laquelle il eſt abbé : car c’eſtoit auſſi le jour de la feſte de N. Dame
