Charles cinquiesme fut celle-là, à l’imitation d’aucuns anciens de son qualibre, d’auoir sceu recognoistre que la raison nous commande assez de nous despouiller, quand noz robbes nous chargent et empeschent, et de nous coucher quand les iambes nous faillent. Il resigna ses moyens, grandeur et puissance à son fils, lors qu’il sentit defaillir en soy la fermeté et la force pour conduire les affaires, auec la gloire qu’il y auoit acquise.
Solue senescentem maturè sanus equum, ne
Peccet ad extremum ridendus, et ilia ducat.
Cette faute, de ne se sçauoir recognoistre de bonne heure, et ne sentir l’impuissance et extreme alteration que l’aage apporte naturellement et au corps et à l’ame, qui à mon opinion est esgale, si l’ame n’en a plus de la moitié, a perdu la reputation de la plus part des grands hommes du monde. I’ay veu de non temps et cognu familierement, des personnages de grande authorité, qu’il estoit bien aisé à voir, estre merucilleusement descheuz de cette ancienne suffisance, que ie cognoissois par la reputation qu’ils en auoient acquise en leurs meilleurs ans. Ie les eusse pour leur honneur volontiers souhaitez retirez en leur maison à leur aise, et deschargez des occupations publiques et guerrieres, qui n’estoient plus pour leurs espaules. I’ay autrefois esté priué en la maison d’vn Gentilhomme veuf et fort vieil, d’vne vieillesse toutefois assez verte. Celluy-cy auoit plusieurs filles à marier, et vn fils desia en aage de paroistre ; cela chargeoit sa maison de plusieurs despences et visites estrangeres, à quoy il prenoit peu de plaisir, non seulement pour le soin de l’espargne, mais encore plus, pour auoir, à cause de l’aage, pris vne forme de vie fort esloignée de la nostre. Ie luy dy vn iour vn peu hardiment, comme i’ay accoustumé, qu’il luy sieroit mieux de nous faire place, et de laisser à son fils sa maison principale, car il n’auoit que celle-là de bien logée et accommodée, et se retirer en vne sienne terre voisine, où personne n’apporteroit incommodité à son repos, puis qu’il ne pouuoit autrement euiter nostre importunité, veu la condition de ses enfans. Il m’en creut depuis, et s’en trouua bien.Ce n’est pas à dire qu’on leur donne, par telle voye d’obligation, de laquelle on ne se puisse plus desdire : ie leur lairrois, moy qui suis à mesme de iouer ce rolle, la iouyssance de ma inaison et de mes biens, mais auec liberté de m’en repentir, s’ils m’en donnoyent occasion : ie leur en lairrois l’vsage, par ce qu’il
