Sicut aquæ tremulum labris vbi lumen ahenis
Sole repercussum, aut radiantis imagine Lunæ.
Omnia peruolitat latè loca, iàmque sub auras
Erigitur, summique ferit laquearia tecti.
Et n’est folie ny réuerie, qu’ils ne produisent en cette agitation,
velut ægri somnia, vanæ
Finguntur species.
L’ame qui n’a point de but estably, elle se perd : Car comme on
dit, c’est n’estre en aucun lieu, que d’estre par tout.
Dernièrement que ie me retiray chez moy, délibéré autant que ie pourroy, ne me mesler d’autre chose, que de passer en repos, et à part, ce peu qui me reste de vie, il me sembloit ne pouuoir faire plus grande faueur à mon esprit, que de le laisser en pleine oysiueté, s’entretenir soy-mesmes, et s’arrester et rasseoir en soy : ce que i’esperois qu’il peust meshuy faire plus aysément, deuenu auec le temps, plus poisant, et plus meur ; mais ie trouue,
qu’au rebours faisant le cheual eschappé, il se donne cent fois
plus de carrière à soy-mesmes, qu’il ne prenoit pour autruy : et
m’enfante tant de chimères et monstres fantasques les vns sur les
autres, sans ordre, et sans propos, que pour en contempler à mon
ayse l’ineptie et l’estrangeté, i’ay commencé de les mettre en rolle :
espérant auec le temps, luy en faire honte à luy mesmes.
CHAPITRE IX.
l n’est homme à qui il siese si mal de se mesler de parler de mémoire.
Car ie n’en recognoy quasi trace en moy : et ne pense qu’il
y en ayt au monde, vne autre si merueilleuse en défaillance. I’ay
toutes mes autres parties viles et communes, mais en cette-là ie
pense eslre singulier et très-rare, et digne de gaigner nom et réputation.
Outre l’inconuenient naturel que i’en souffre : car certes,
veu sa nécessité, Platon a raison de la nommer vne grande et puissante
déesse : si en mon pays on veut dire qu’vn homme n’a point de
sens, ils disent, qu’il n’a point de mémoire : et quand ie me plains
du défaut de la mienne, ils me reprennent et mescroient, comme
si ie m’accusois d’estre insensé : ils ne voyent pas de chois entre
mémoire et entendement. C’est bien empirer mon marché : mais ils
