n’est pas à moy de chercher des victoires desrobees : malo me fortunæ pœniteat, quàm victoriæ pudeat.
Atque idem fugientem haud est dignatus Orodem
Sternere, nec iacta cæcum dare cuspide vulnus :
Obuius, aduersôque occurrit, séque viro vir
Contulit, haud furto melior, sed fortibus armis.
CHAPITRE VII.
a mort, dit-on, nous acquitte de toutes nos obligations. I’en sçay
qui l’ont prins en diuerse façon. Henry septiesme Roy d’Angleterre
fit composition auec Dom Philippe fils de l’Empereur
Maximilian, ou pour le confronter plus honnorablement, père de
l’Empereur Charles cinquiesme, que ledict Philippe remettoit entre
ses mains le Duc de Suffolc de la Rose blanche, son ennemy, lequel
s’en estoit fuy et retiré au pays bas, moyennant qu’il promettoit de
n’attenter rien sur la vie dudict Duc : toutesfois venant à mourir, il
commanda par son testament à son fils, de le faire mourir, soudain
après qu’il seroit decedé. Dernièrement en cette tragédie que
le Duc d’Albe nous fit voir à Bruxelles és Contes de Horne et d’Aiguemond,
il y eut tout plein de choses remerquables : et entre
autres que ledict Comte d’Aiguemond, soubs la foy et asseurance
duquel le Comte de Horne s’estoit venu rendre au Duc d’Albe,
requit auec grande instance, qu’on le fist mourir le premier : affin
que sa mort l’affranchist de l’obligation qu’il auoit audict Comte
de Horne. Il semble que la mort n’ayt point deschargé le premier de
sa foy donnee, et que le second en estoit quitte, mesmes sans mourir.
Nous ne pouuons estre tenus au delà de nos forces et de nos
moyens. À cette cause, par ce que les effects et exécutions ne sont
aucunement en nostre puissance, et qu’il n’y a rien en bon escient
en nostre puissance, que la volonté : en celle là se fondent par nécessité
et s’establissent toutes les règles du deuoir de l’homme. Par
ainsi le Comte d’Aiguemond tenant son ame et volonté endebtee à
sa promesse, bien que la puissance de l’effectuer ne fust pas en ses
mains, estoit sans doute absous de son deuoir, quand il eust
suruescu le Comte de Horne. Mais le Roy d’Angleterre faillant à sa
parolle par son intention, ne se peut excuser pour auoir retardé