Page:Montaigne - Essais, Didot, 1907, tome 1.djvu/66

Cette page a été validée par deux contributeurs.
46
ESSAIS DE MONTAIGNE.

prenans guerre, qu’après l’auoir dénoncée, et souuent après auoir assigné l’heure et lieu de la bataille. De cette conscience ils renuoierent à Pyrrhus son traistre Médecin, et aux Phalisques leur desloyal maistre d’escole. C’estoient les formes vrayement Romaines, non de la Grecque subtilité et astuce Punique, où le vaincre par force est moins glorieux que par fraude. Le tromper peut seruir pour le coup : mais celuy seul se tient pour surmonté, qui scait l’auoir esté ny par ruse, ny de sort, mais par vaillance de troupe à troupe, en vue franche et iuste guerre. Il appert bien par ce langage de ces bonnes gents, qu’ils n’auoient encore receu cette belle sentence,

dolus an virtus quis in hoste requirat ?

Les Achaïens, dit Polybe, detestoient toute voye de tromperie en leurs guerres, n’estimants victoire, sinon où les courages des ennemis sont abbatus. Eam vir sanctus et sapiens sciet veram esse victoriam, quæ salua fide, et integra dignitate parabitur, dit vn autre :

Vos ne velit, an me regnare hera : quidue ferat fors
Virtute experiamur.

Au Royaume de Ternate, parmy ces nations que si à pleine bouche nous appelons Barbares, la coustume porte, qu’ils n’entreprennent guerre sans l’auoir dénoncée : y adioustans ample déclaration des moiens qu’ils ont à y emploier, quels, combien d’hommes, quelles munitions, quelles armes, offensiues et defensiues. Mais aussi cela faict, ils se donnent loy de se seruir à leur guerre, sans reproche, de tout ce qui aide à vaincre.Les anciens Florentins estoient si esloignés de vouloir gaigner aduantage sur leurs ennemis par surprise, qu’ils les aduertissoient vn mois auant que de mettre leur exercite aux champs, par le continuel son de la cloche qu’ils nommoient, Martinella.Quant à nous moins superstitieux, qui tenons celuy auoir l’honneur de la guerre, qui en a le profit, et qui après Lysander, disons que, Où la peau du Lyon ne peut suffire, il y faut coudre vn lopin de celle du Regnard, les plus ordinaires occasions