Page:Montaigne - Essais, Didot, 1907, tome 1.djvu/54

34

ESSAIS DE MONTAIGNE.

d’exemples anciens, laissant à part les nostres, qu’il n’est besoing que ie m’y estende. Edouard premier Roy d’Angleterre, ayant essayé aux longues guerres d’entre luy et Robert Roy d’Escosse, combien sa présence donnoit d’aduantage à ses affaires, rapportant tousiours la victoire de ce qu’il entreprenoit en personne ; mourant, obligea son fils par solennel serment, à ce qu’estant trespassé, il fist bouillir son corps pour desprendre sa chair d’auec les os, laquelle il fit enterrer : et quant aux os, qu’il les reseruast pour les porter auec luy, et en son armee, toutes les fois qu’il luy aduiendroit d’auoir guerre contre les Escossois : comme si la destinée auoit fatalement attaché la victoire à ses membres. Iean Zischa, qui troubla la Bohême pour la deffence des erreurs de VViclef, voulut qu’on l’escorchast après sa mort, et de sa peau qu’on fist vn tabourin à porter à la guerre contre ses ennemis : estimant que cela ayderoit à continuer les aduantages qu’il auoit eus aux guerres, par luy conduictes contre eux. Certains Indiens portoient ainsin au combat contre les Espaignols, les ossemens d’vn de leurs Capitaines, en considération de l’heur qu’il auoit eu en viuant. Et d’autres peuples en ce mesme monde, traînent à la guerre les corps des vaillans hommes, qui sont morts en leurs batailles, pour leur seruir de bonne fortune et d’encouragement. Les premiers exemples ne reseruent au tombeau, que la réputation acquise par leurs actions passées : mais ceux-cy y veulent encore mesler la puissance d’agir.Le faict du Capitaine Bayard est de meilleure composition, lequel se sentant blessé à mort d’vne harquebusade dans le corps, conseillé de se retirer de la meslee, respondit qu’il ne commenceroit point sur sa fin à tourner le dos à l’ennemy : et ayant combatu autant qu’il eut de force, se sentant défaillir, et eschapper du cheual, commanda à son maistre d’hostel, de le coucher au pied d’vn arbre : mais que ce fust en façon qu’il mourust le visage tourné vers l’ennemy : comme il fit.Il me faut adiouster cet autre exemple aussi remarquable pour cette considération, que nul des precedens. L’Empereur Maximilian bisayeul du Roy Philippes, qui est à présent, estoit Prince doué de tout plein de grandes qualitez, et entre autres d’vne beauté de corps singulière : mais parmy ces humeurs, il auoit ceste cy bien contraire à celle des Princes, qui pour despescher les plus importants affaires, font leur throsne de leur chaire percee : c’est qu’il n’eut iamais valet de chambre, si priué, à qui il permist de le voir en sa garderobbe : il se desroboit pour tomber de l’eau, aussi religieux qu’vne pucelle à ne descouurir ny à Médecin ny à qui que ce fust les parties qu’on a accoustumé de tenir cachées. Moy qui ay la bouche si effrontée, suis pourtant par complexion touché de cette