dents, qu’il n’en daignoit entrer en ceruelle, non plus que d’accidens ordinaires.En la bataille nauale qu’Augustus gaigna contre Sextus Pompeius en Sicile, sur le point d’aller au combat, il se trouua pressé d’vn si profond sommeil, qu’il fallut que ses amis l’esueillassent, pour donner le signe de la bataille. Cela donna occasion à M. Antonius de luy reprocher depuis, qu’il n’auoit pas eu le cœur, seulement de regarder les yeux ouuerts, l’ordonnance de son armée ; et de n’auoir osé se présenter aux soldats, iusques à ce qu’Agrippa luy vint annoncer la nouuelle de la victoire, qu’il auoit eu sur ses ennemis. Mais quant au ieune Marius, qui fit encore pis (car le iour de sa dernière iournée contre Sylla, après auoir ordonné son armée, et donné le mot et signe de la bataille, il se coucha dessoubs vn arbre à l’ombre, pour se reposer, et s’endormit si serré, qu’à peine se peut-il esueiller de la route et fuitte de ses gens, n’ayant rien veu du combat) ils disent que ce fut pour estre si extrêmement aggraué de trauail, et de faute de dormir, que nature n’en pouuoit plus.Et à ce propos les médecins aduiseront si le dormir est si nécessaire, que nostre vie en dépende ; car nous trouuons bien, qu’on fit mourir le Roy Perseus de Macédoine prisonnier a Rome, luy empeschant le sommeil, mais Pline en allègue, qui ont vescu long temps sans dormir. Chez Hérodote, il y a des nations, ausquelles les hommes dorment et veillent par demy années. Et ceux qui escriuent la vie du sage Epimenides, disent qu’il dormit cinquante sept ans de suitte.
CHAPITRE XLV.
l y eut tout plein de rares accidens en nostre battaille de Dreux :
mais ceux qui ne fauorisent pas fort la réputation de M. de Guyse,
mettent volontiers en auant, qu’il ne se peut excuser d’auoir faict
alte, et temporisé auec les forces qu’il commandoit, cependant qu’on
enfonçoit Monsieur le Connestable chef de l’armée, auecques l’artillerie :
et qu’il valoit mieux se hazarder, prenant l’ennemy par flanc,
qu’attendant l’aduantage de le voir en queuë, souffrir vne si lourde
perte. Mais outre ce, que l’issuë en tesmoigna, qui en débattra sans
passion, me confessera aisément, à mon aduis, que le but et la
