non de son harnois : vn leurier, de sa vistesse, non de son colier : vn oyseau, de son aile, non de ses longes et sonnettes. Pourquoy de mesmes n’estimons nous vn homme par ce qui est sien ? Il a vn grand train, vn beau palais, tant de crédit, tant de rente : tout cela est autour de luy, non en luy. Vous n’achetez pas vn chat en poche : si vous marchandez vn cheual, vous luy ostez ses bardes, vous le voyez nud et à descouuert. Ou s’il est couuert, comme on les presentoit anciennement aux Princes à vendre, c’est par les parties moins nécessaires, à fin que vous ne vous amusiez pas à la beauté de son poil, ou largeur de sa croupe, et que vous vous arrestiez principalement à considérer les iambes, les yeux, et le pied, qui sont les membres les plus vtiles.
Regibus hic mos est : vbi equos mercantur, opertos
Inspiciunt ; ne si faciès, vt sæpe, décora
Molli fulta pede est, emptorem inducat hiantem,
Quàd pulchræ dunes, breue quôd caput, ardua ceruix.
Pourquoy estimant vn homme l’estimez vous tout enueloppé et empacqueté ? Il ne nous faict montre que des parties, qui ne sont aucunement siennes : et nous cache celles, par lesquelles seules on peut vrayement iuger de son estimation. C’est le prix de l’espée que vous cerchez, non de la guaine : vous n’en donnerez à l’aduenture pas vn quatrain, si vous l’auez despouillée. Il le faut iuger par luy mesme, non par ses atours. Et comme dit tres-plaisamment vn ancien : Sçauez vous pourquoy vous l’estimez grand ? vous y comptez la hauteur de ses patins. La base n’est pas de la statue. Mesurez le sans ses eschaces. Qu’il mette à part ses richesses et honneurs, qu’il se présente en chemise. A il le corps propre à ses functions, sain et allègre ? Quelle ame a il ? Est elle belle, capable, et heureusement pourueue de toutes ses pièces ? Est elle riche du sien, ou de l’autruy ? La fortune n’y a elle que voir ? Si les yeux ouuerts elle attend les espées traites : s’il ne luy chaut par où luy sorte la vie, par la bouche, ou par le gosier : si elle est rassise, equable et contente : c’est ce qu’il faut veoir, et iuger par là les extrêmes différences qui sont entre nous. Est-il
sapiens, sibique imperiosus ;
Quem neque pauperies, neque mors, neque vincula terrent ;
Responsare cupidinibus, contemnere honores
Fortis ; et in seipso totus teres atque rotundus,
Externi ne quid valeat per læue morari,
In quem manca mit semper fortuna ?
Vn tel homme est cinq cens brasses au dessus des Royaumes et des Duchez : il est luy mesmes à soy son empire.
Que luy reste il à désirer ?
Nónne videmus,
Nil aliud sibi naturam latrare, nisi vt quoi
