fais estat qu’il te faut souffrir toutes les sortes de tourmens qui se pourront inuenter contre vn captif. L’autre, d’vne mine non seulement asseuree, mais rogue et altiere, se tint sans mot dire à ces menaces. Lors Alexandre voyant l’obstination à se taire : A il flechy vn genouil ? luy est-il eschappé quelque voix suppliante ? Vrayement ie vainqueray ce silence : et si ie n’en puis arracher parole, l’en arracheray au moins du gémissement. Et tournant sa cholere en rage, commanda qu’on luy perçast les talons, et le fit ainsi trainer tout vif, deschirer et desmembrer au cul d’vne charrette. Seroit-ce que la force de courage luy fust si naturelle et commune, que pour ne l’admirer point, il la respectast moins ? ou qu’il l’estimast si proprement sienne, qu’en cette hauteur il ne peust souffrir de la veoir en vn autre, sans le despit d’vne passion enuieuse ? ou que l’impétuosité naturelle de sa cholere fust incapable d’opposition ? De vray, si elle eust receu bride, il est à croire, qu’en la prinse et désolation de la ville de Thebes elle l’eust receue : à veoir cruellement mettre au fil de l’espee tant de vaillans hommes, perdus, et n’ayans plus moyen de defence publique. Car il en fut tué bien six mille, desquels nul ne fut veu ny fuiant, ny demandant mercy : au rebours cerchans, qui çà, qui là, par les rues, à affronter les ennemis victorieux : les prouoquans à les faire mourir d’vne mort honorable. Nul ne fut veu, qui n’essaiast en son dernier souspir, de se venger encores : et à tout les armes du desespoir consoler sa mort en la mort de quelque ennemy. Si ne trouua l’affliction de leur vertu aucune pitié : et ne suffit la longueur d’vn iour à assouuir sa vengeance. Ce carnage dura iusques à la dernière goûte de sang espandable : et ne s’arresta qu’aux personnes désarmées, vieillards, femmes et enfants, pour en tirer trente mille esclaues.
e suis des plus exempts de cette passion, et ne l’ayme ny l’estime : quoy que le monde ayt entrepris, comme à prix faict, de l’honorer de faueur particulière. Ils en habillent la sagesse,
