longueurs et difficultés extrêmes, ayant prins la ville de Rege, et en icelle le Capitaine Phyton, grand homme de bien, qui l’auoit si obstinéement defendue, voulut en tirer vn tragique exemple de vengeance. Il luy dict premièrement, comment le iour auant, il auoit faict noyer son fils, et tous ceux de sa parenté. À quoy Phyton respondit seulement, qu’ils en estoient d’vn iour plus heureux que luy. Apres il le fit despouiller, et saisir à des Bourreaux, et le traîner par la ville, en le fouëttant très ignominieusement et cruellement : et en outre le chargeant de félonnes parolles et contumelieuses. Mais il eut le courage tousiours constant, sans se perdre. Et d’vn visage ferme, alloit au contraire ramenteuant à haute voix, l’honorable et glorieuse cause de sa mort, pour n’auoir voulu rendre son païs entre les mains d’vn tyran : le menaçant d’vne prochaine punition des dieux. Dionysius, lisant dans les yeux de la commune de son armée, qu’au lieu de s’animer des brauades de cet ennemy vaincu, au mespris de leur chef, et de son triomphe, elle alloit s’amollissant par l’estonnement d’vne si rare vertu, et marchandoit de se mutiner, et mesmes d’arracher Phyton d’entre les mains de ses sergens, feit cesser ce martyre : et à cachettes l’enuoya noyer en la mer. Certes, c’est vn subiect merueilleusement vain, diuers, et ondoyant, que l’homme : il est malaisé d’y fonder iugement constant et vniforme. Voyla Pompeius qui pardonna à toute la ville des Mamertins, contre laquelle il estoit fort animé, en considération de la vertu et magnanimité du citoyen Zenon, qui se chargeoit seul de la faute publique, et ne requeroit autre grâce que d’en porter seul la peine. Et l’hoste de Sylla, ayant vsé en la ville de Peruse de semblable vertu, n’y gaigna rien, ny pour soy, ny pour les autres.
Et directement contre mes premiers exemples, le plus hardy des hommes et si gratieux aux vaincus Alexandre, forçant apres beaucoup de grandes difficultez la ville de Gaza, rencontra Betis qui y commandoit, de la valeur duquel il auoit, pendant ce siège, senty des preuues merueilleuses, lors seul, abandonné des siens, ses armes despecees, tout couuert de sang et de playes, combatant encores au milieu de plusieurs Macedoniens, qui le chamailloient de toutes parts : et luy dit, tout piqué d’vne si chère victoire : car entre autres dommages, il auoit receu deux fresches blessures sur sa personne : Tu ne mourras pas comme tu as voulu, Betis :
