Que c’est que scauoir et ignorer, qui doit estre le but de l’estude : que c’est que vaillance, tempérance, et iustice : ce qu’il y a à dire entre l’ambition et l’auarice : la seruitude et la subiection, la licence et la liberté : à quelles marques on congnoit le vray et solide contentement : iusques où il faut craindre la mort, la douleur et la honte.
Quels ressors nous meuuent, et le moyen de tant diuers branles en
nous. Car il me semble que les premiers discours, dequoy on luy
doit abreuuer l’entendement, ce doiuent estre ceux, qui règlent ses
mœurs et son sens, qui luy apprendront à se cognoistre, et à
sçauoir bien mourir et bien viure.Entre les arts libéraux, commençons
par l’art qui nous faict libres. Elles seruent toutes voirement
en quelque manière à l’instruction de nostre vie, et à son
vsage : comme toutes autres choses y seruent en quelque manière
aussi. Mais choisissons celle qui y sert directement et professoirement.
Si nous sçauions restraindre les appartenances de nostre vie
à leurs iustes et naturels limites, nous trouuerions, que la meilleure
part des sciences, qui sont en vsage, est hors de nostre vsage.
Et en celles mesmes qui le sont, qu’il y a des estendues et enfonceures
tres-inutiles, que nous ferions mieux de laisser là : et suiuant
l’institution de Socrates, borner le cours de nostre estude en
icelles, où faut l’vtilité.
sapere aude,
Incipe : Viuendi qui rectè prorogal horam,
Rusticus expectat diim defluat amnis, al ille
Labitur, et labetur in omne volubilis æuum.
C’est vne grande simplesse d’aprendre à nos enfans,
Quid moueant pisces, animosàque signa leonis,
Lotus et Hesperia quid capricornus aqua ;
la science des astres et le mouuement de la huictiesme sphère,
auant que les leurs propres.
τί πλειάδεσσι χᾴμοί,
τί δ’ᾴστράσι βοώτεω.
Anaximenes escriuant à Pythagoras : De quel sens puis ie m’amuser
aux secrets des estoilles, ayant la mort ou la seruitude touiours
présente aux yeux ? Car lors les Roys de Perse preparoient la guerre
contre son pays. Chacun doit dire ainsin. Estant battu d’ambition,
d’auarice, de témérité, de superstition : et ayant au dedans tels
autres ennemis de la vie : iray-ie songer au bransle du monde ?