Page:Montaigne - Essais, Didot, 1907, tome 1.djvu/250

si exangues, si descharnees, et si vuides de matière et de sens, que ce n’estoient voirement que parolles Françoises : au bout d’vn long et ennuyeux chemin, ie vins à rencontrer vne pièce haute, riche et esleuee iusques aux nües : si i’eusse trouué la pente douce, et la montée vn peu alongee, cela eust esté excusable : c’estoit vu précipice si droit et si coupé que des six premières parolles ie cogneuz que ie m’enuolois en l’autre monde : de là ie descouuris la fondrière d’où ie venois, si basse et si profonde, que ie n’eus oncques puis le cœur de m’y raualer. Si i’estoffois l’vn de mes discours de ces riches despouilles, il esclaireroit par trop la bestise des autres. Reprendre en autruy mes propres fautes, ne me semble non plus incompatible, que de reprendre, comme ie fay souuent, celles d’autruy en moy. Il les faut accuser par tout, et leur oster tout lieu de franchise. Si sçay ie, combien audacieusement i’entreprens moy-mesmes à tous coups, de m’egaler à mes larrecins, d’aller pair à pair quand et eux : non sans vne temeraire espérance, que ie puisse tromper les yeux des iuges à les discerner. Mais c’est autant par le bénéfice de mon application, que par le bénéfice de mon inuention et de ma force. Et puis, ie ne luitte point en gros ces vieux champions là, et corps à corps : c’est par reprinses, menues et légères attaintes. Ie ne m’y aheurte pas : ie ne fay que les taster : et ne vay point tant, comme ie marchande d’aller. Si ie leur pouuoy tenir pâlot, ie serois honneste homme : car ie ne les entreprens, que par où ils sont les plus roides. De faire ce que i’ay découuert d’aucuns, se couurir des armes d’autruy, iusques à ne montrer pas seulement le bout de ses doigts : conduire son dessein (comme il est aysé aux sçauans en vne matière commune) sous les inuentions anciennes, rappiecees par cy par là : à ceux qui les veulent cacher et faire propres, c’est premièrement iniustice et lascheté, que n’ayans rien en leur vaillant, par où se produire, ils cherchent à se présenter par vne valeur purement estrangere : et puis, grande sottise, se contentant par piperie de s’acquérir l’ignorante approbation du vulgaire, se descrier enuers les gents d’entendement, qui hochent du nez cette incrustation empruntée :