puis. Toutesfois quand il y auroit vne si grossière et apparante ou ignorance ou couardise, qu’elle surpassast toutes les ordinaires, ce seroit raison de la prendre pour suffisante preuue de meschanceté et de malice, et de la chastier pour telle.
CHAPITRE XVI.
’observe en mes voyages cette practique, pour apprendre tousiours
quelque chose, par la communication d’autruy, qui est vne
des plus belles escholes qui puisse estre, de ramener tousiours ceux,
auec qui ie confère, aux propos des choses qu’ils sçauent le mieux.
Basti al nocchiero ragionar de’ venti,
Al bifolco dei tort, et le sue piaghe
Conti’l guerrier, conti ’l pastor gli armenti.
Car il aduient le plus souuent au contraire, que chacun choisit
plustost à discourir du mestier d’vn autre que du sien : estimant
que c’est autant de nouuelle réputation acquise : tesmoing le reproche
qu’Archidamus feit à Periander, qu’il quittoit la gloire d’vn
bon Médecin, pour acquérir celle de mauuais Poëte. Voyez combien
César se desploye largement à nous faire entendre ses inuentions à
bastir ponts et engins : et combien au prix il va se serrant, où il
parle des offices de sa profession, de sa vaillance, et conduite de sa
milice. Ses exploicts le vérifient assez Capitaine excellent : il se veut
faire cognoistre excellent Ingénieur ; qualité aucunement estrangere.
Le vieil Dionysius estoit très grand chef de guerre, comme il
conuenoit à sa fortune : mais il se trauailloit à donner principale
recommendation de soy, par la poésie : et si n’y sçauoit guère. Vn
homme de vacation iuridique, mené ces iours passez voir vne
estude fournie de toutes sortes de liures de son mestier, et de tout
autre mestier, n’y trouua nulle occasion de s’entretenir : mais il
s’arresta à gloser rudement et magistralement vne barricade logée
sur la vis de l’estude, que cent Capitaines et soldats recognoissent
tous les iours, sans remorque et sans offense.
Par ce train vous ne faictes iamais rien qui vaille. Ainsin, il faut
trauailler de reietter tousiours l’architecte, le peintre, le cordonnier,