Page:Montaigne - Essais, Éd de Bordeaux, 3.djvu/74

Le texte de cette page a été corrigé et est conforme au fac-similé.

La curiosité est vicieuse par tout, mais elle est pernicieuse icy. C’est folie de vouloir s’esclaircir d’un mal auquel il n’y a point de medecine qui ne l’empire et le rengrege ; duquel la honte s’augmente et se publie principalement par la jalousie ; duquel la vanjance blesse plus nos enfans qu’elle ne nous guerit ? Vous assechez et mourez à la queste d’une si obscure verification. Combien piteusement y sont arrivez ceux de mon temps qui en sont venus à bout ! Si l’advertisseur n’y presente quand et quand le remede et son secours, c’est un advertissement injurieux et qui merite mieux un coup de poignard que ne faict un dementir. On ne se moque pas moins de celuy qui est en peine d’y pourvoir que de celuy qui l’ignore. Le caractere de la cornardise est indelebile : à qui il est une fois attaché, il l’est tousjours ; le chastiement l’exprime plus que la faute. Il faict beau voir arracher de l’ombre et du doubte nos malheurs privés, pour les trompeter en eschaffaux tragiques ; et mal’heurs qui ne pinsent que par le raport. Car bonne femme et bon mariage se dict non de qui l’est, mais duquel on se taist. Il faut estre ingenieux à eviter cette ennuyeuse et inutile cognoissance. Et avoyent les Romains en coustume, revenans de voyage, d’envoyer au devant en la maison faire sçavoir leur arrivée aus femmes, pour ne les surprendre. Et pourtant a introduit certaine nation que le prestre ouvre le pas à l’espousée, le jour des nopces, pour oster au marié le doubte et la curiosité de cercher en ce premier essay si elle vient à luy vierge ou blessée d’un’amour estrangere. Mais le monde en parle. Je sçay çant honestes hommes coqus, honnestement et peu indecemment. Un galant homme en est pleint, non pas desestimé. Faites que vostre vertu estouffe vostre mal’heur, que les gens de bien en maudissent l’occasion, que celuy qui vous offence tremble seulement à le penser. Et puis, de qui ne parle on en ce sens, depuis le petit jusques au plus grand ?