Quant el a son con enossé ;
Or sachiez qu’il eüst pallé,
Se ce ne fust que el i mist. »
Li quens à la contesse dist
Qu’il li covient à delivrer.
Cele ne l’osa refuser :
Si ala delivrer son con,
Si en a tret tot le queton,
A un crochet fors l’en gita.
Mout se repent quant l’i bouta ;
Puis revient arriere sanz faille.
Bien sait qu’a perdu la fermaille,
Qu’ele gaja, si fist que fole.
Li chevaliers au con parole ;
Si li demande que devoit,
Que tost respondu ne l’avoit.
Ce dit li cons : « Ge ne pooie,
Por ce que enconbrez estoie
Du coton que ma dame i mist. »
Quant li quens l’ot, forment s’en rist,
Et tuit li chevalier s’en ristrent ;
A la contesse trés bien distrent
Qu’el a perdu ; ne parolt mais,
Mais or face au chevalier pais.
Et el si fist, plus n’i tarja :
Soissante livres li paia,
Et cil les reçust à grant joie,
Qui mestier avoit de monoie,
Et qui si bon eür avoit
Que toz li mondes l’ameroit,
Page:Montaiglon - Recueil général et complet des fabliaux des 13e et 14e siècles, tome VI.djvu/98
Cette page a été validée par deux contributeurs.
![](http://upload.wikimedia.org/wikipedia/commons/thumb/0/02/Montaiglon_-_Recueil_g%C3%A9n%C3%A9ral_et_complet_des_fabliaux_des_13e_et_14e_si%C3%A8cles%2C_tome_VI.djvu/page98-1024px-Montaiglon_-_Recueil_g%C3%A9n%C3%A9ral_et_complet_des_fabliaux_des_13e_et_14e_si%C3%A8cles%2C_tome_VI.djvu.jpg)