Le texte de cette page a été corrigé et est conforme au fac-similé.
CXLV
DU PRESTRE ET DU LEU
Bibl. roy. de Berlin, Mss. Hamilton 257, fol. 88 c à 88 d.[1]
n prestre maneit en Chartein[2] ;
S’amoit la fame à .I. vilein.
Le vilein, qui garde s’en prist,
En la voie une fosse fist
Par où cil seut venir laienz.
.I. leu vint la nuit et chiet enz,
Car la nuit estoit trop oscure.
Le prestre, par mesaventure,
Si con soleit est revenuz,
Einz ne sot mot : s’est enz chaüz.
La dame, cui il anuioit
Du proverre qui tant tarjoit,
A sa meschine dit : « Cha va
Savoir se cel sire vendra. »
La meschine est par là venue :
En cele fosse rest cheüe.
Li vilein par mein se leva,
Vers sa fosse droit en ala :
Ce qu’il queroit trueve, et jura
Que chascun son loier avra.