Le texte de cette page a été corrigé et est conforme au fac-similé.
CXXXIX
DU PRESTRE TEINT
[par Gautier]
Bibl. roy. de Berlin, Mss. Hamilton 257, fol. 13 c à 15 d.
l est bien droiz que je retraie,
Puis que nus bons ne m’en deloie,
D’une aventure que je sai
Qu’avint en l’entrée de mai
A Orliens, la bone cité,
Où j’ai par meinte foiz esté.
L’aventure est et bone et bele,
Et la rime fresche et novele,
Si con je la fis l’autre jour
A Orliens où fui à sejour.
Tant i sejornai et tant fui
Que mon mantel menjai et bui
Et une cote et .i. sercot.
Mout i paié bien mon escot.
Ne m’en doit riens demander l’oste
Qui volentiers nos gens acoste ;
A l’entrer lor fet bele chiere :
A l'essir est d’autre maniere.
Bien set conter quant qu’il i met,
Neïs le sel qu’el pot remet ;
