Por aler joer s’asemblerent.
Enz en cel vergier s’en alerent :
L’anel troverent, ce me semble ;
Si valoit trop bien, con moi semble,
.XL. livres tout pour voir.
Chascune le voleit avoir,
Tant que l’une se pourpensa :
Cele qui mieus conchiera
Son baron, ou mieus, ou plus bel,
Cele avra gaaignié l’anel.
A ce se sunt entracordées :
A lour ostel sunt reperées.
« Sire, » fet l’une à son baron,
« Il a là fors trop bon poison :
Donez m’en .I. à metre en paste ! »
Li bourgeis meintenant se haste ;
Si li a fet tost aporter.
El dit qu’el ira enpaster,
Et commande à apareillier,
Si qu’il n’i eit fors du mengier,
Si tost con ele revendra.
Atant s’en torne, si s’en va :
.VIII. jours fu là où il li sist,
Et à cele huiteine reprist
.I. poison autel com estoit
Cil que son baron li avoit
A autretel jour acheté ;
Raporte le tot en pasté,
Et dit : « Or cha ! mengeron nos ? »
Dist li bourgeis : « Dont venez vos ?
Page:Montaiglon - Recueil général et complet des fabliaux des 13e et 14e siècles, tome VI.djvu/12
Cette page a été validée par deux contributeurs.
2
42
fabliau cxxxviii
