Son harnois, et puis[1] trest ses bestes.
Lors primes[2] s’est levez li prestres ;
Il et son clerc vont au moustier
Chanter et fere[3] lor mestier,
Et la dame remest dormant.[4]
Et ses ostes[5] tout maintenant
Se vest et chauce sanz demeure,
Quar bien en fu et tans[6] et eure.
En la chambre[7], sanz plus atendre,
Vint à la dame[8] congié prendre ;
La clique sache[9], l’uis ouvri ;
Et la dame[10] si s’esperi.
Ses ieus ouvri, son oste voit
Devant s’esponde trestout droit[11].
Lors li demande[12] dont il vient
Et de quel chose il li sovient :
« Dame, » fet il, « graces vous rent ;
Herbregié m’avez à talent
Et mout[13] m’avez biau samblant fait. »
Atant vers le[14] chevès se trait ;
Sa main mist sor[15] le chaveçuel
Et[16] tret arriere le linçuel ;
Si voit la[17] gorge blanche et bele,
Et la poitrine et la mamele[18] :
« E ! Dieus, » dist il[19], « je voi miracles ;
Sainte Marie, sainz[20] Romacles,
Comme est li doiens bien venuz
Qui o tel dame[21] gist toz nuz !
Que si[22] m’ait sainz Onorez,
Uns rois en fust[23] toz honorez.
- ↑ 231 — B, Son harnas fait et. C, Son pot a pris, si.
- ↑ 232 — C, Adonques.
- ↑ 234 — B, dire. C, lire. — B, C, leur sautier.
- ↑ 235-238 — Remplacés dans C :
Et li bouchiers si s’est levez,
Si s’est vestuz et atornez. - ↑ 236 — B, Et li bouchiers de.
- ↑ 238 — B, saisons et.
- ↑ 239 — C, Et est venuz.
- ↑ 240 — B, Vint à s’ostesse. C, Droit à la dame.
- ↑ 241 — C, Le loquet hauce.
- ↑ 242 — B, Le bele dame.
- ↑ 244 — B, estoit tout droit. — C, Devant son lit où il estoit.
- ↑ 245 — B, Lors s’esmerveille. C, Mout se mervelle.
- ↑ 249 — C, Et si.
- ↑ 250 — C, près du.
- ↑ 251 — B, Son chief mist seur. C, Met sa main sus.
- ↑ 252 — B, Puis.
- ↑ 253 — B, Si vit le. C, Et voit sa.
- ↑ 254 — B, Et se p. et se m. C, Et sa boutine et sa m.
- ↑ 255 — dist il. B, fait il.
- ↑ 256 — Saint Berthelemi et.
- ↑ 258 — C, Qu’avec tel fame.
- ↑ 259 — B, Ausi. — C, Si m’aït bien.
- ↑ 260 — C, en seroit.
