Page:Montaiglon - Recueil général et complet des fabliaux des 13e et 14e siècles, tome III.djvu/243

200

233

du bouchier d’abevile

En essau^[1] avoec la mesnie,
Je ne di mie vilonie,
Ainz^[2] mès plus bele char ne fu,
Metez le cuire^[3] sor le fu ;
175Veez comme est tendre et refete :^[4]
Ainçois que la saveur^[5] soit fete
Ert ele cuite voirement^[6].
— Biaus ostes, fetes^[7] vo talent ;
Sor vous ne m’en sai entremetre.
180— Fetes donques^[8] la table metre.
— C’est prest ; n’i a fors de laver^[9]
Et des chandoiles alumer. »
Seignor, ne vous mentirai mie ;
Li doiens avoit une amie
185Dont il si fort^[10] jalous estoit,
Toutes les nuiz^[11] qu’ostes avoit,
La fesoit en sa chambre entrer.
Mès cele nuit la fist souper
Avoec son oste liement.^[12]
190Servi furent mout richement
De bone char et de bon vin.
De blans dras, qui erent de lin,
Fist on fere au bouchier .I. lit ;
Mout ot leenz de son delit.
195Li doiens sa meschine apele :
« Je te commant, » fet il, « suer bele,
Que noz ostes soit bien et aise^[13].
Si qu’il^[14] n’ait rien qui li desplaise. »
Atant se vont^[15] couchier ensamble
200Il et la dame, ce me samble,

1. 171 — B, essiau.
2. 173 — B, C, C’onques.
3. 174 — cuire. B, rostir.
4. 175 — C, Vez comme elle est crasse.
5. 176 — saveur. C, sausse.
6. 177 — B, vraiement.
7. 178 — fetes. C, à vo.
8. 180 — B, Donc faites tost. C, Or faites donc.
9. 181 — C, n’i a que du laver.
10. 185 — si fort. B, si fais. — C, jalous forment estoit.
11. 186 — nuiz. B, fois.
12. 189-194 — Il manque certainement un vers dans le ms. B, qui s’exprime ainsi :

    A la table avoec le bouchier…
    Quant il ont mengié à delit,
    La dame fist parer .I. lit
    Avec son oste bon et bel
    De blans dras bué[s] de novel.

    On lit dans C :

    Avec son oste bien et bel
    Et menja de maint bon morsel
    Celle nuit avec le bouchier.
    Et fet samblant que mout l’ait chier.
    Quant orent mengié par delit,
    La dame li fist fere .I. lit
    De blans dras lavez de nouvel ;
    Si li fist et tost et isnel.

13. 197 — C, à ese. — Ce vers et le suivant sont remplacés dans B :

    Que nos estes sire Davis
    Soit aaisiés à son devis,
    Si qu’il n’ait riens qui li desplaise,
    Par lui avons esté bien aaise.

14. 198 — C, Et qu’il.
15. 199 — B, s’en vont.