Et les autres affliccions
Qui sont nès ès prelations ;
L’estat de Clergie desprise,
Et dist que mieux vaut Marchandise.
Marchans gagnyent ardiement,
Merchans vivent aisiement,
Marchans puent prouffit aquerre
Et en la mer et en la terre.
Lors fist ses nefz appareillier,
Outre mer[1] s’en vait por gagnier,
Mais, quant fust en la mer profonde,
Regarda le peril de l’onde,
Et se santist le cuer amer
Par l’esmeuvement de la mer,
Tantoust arrière s’en retourne ;
A cultiver terre s’atourne[2].
Cilz, qui avoit le cuer volage,
Commencza louuer cultivage,
Quar l’en puet gagnier en cultil
Sans grant travail et sans peril,
Sans aler loing de sa maison.
Mais après vint une saison,
Quant il cuida grant gaing aquerre,
Sa semence pourrist en terre
Et ne gita herbe ne grain.
Si se sentist por fol vilain,
Et jura par sa main senestre
Que Chevalier lui convient estre,
Quar Chevaliers ont les honneurs
Et les estas de grans seigneurs.
Page:Montaiglon - Recueil général et complet des fabliaux des 13e et 14e siècles, tome II.djvu/279
Le texte de cette page a été corrigé et est conforme au fac-similé.
50
265
des estats du siecle