Page:Montaiglon - Recueil général et complet des fabliaux des 13e et 14e siècles, tome II.djvu/233

138

219

le chevalier, sa dame et le clerc

Pur hounte ne pout descoverir
110Ke maus de amur la fist sentir ;
Bien vout ke le clerk la amast
E ke de amur la priast.
Ici avoit estrange amur :
Nul ne savoit de autri dolur ;
115La dame del clerk ne sout novele
Ne li clerk de la dammoisele.
Mult furent les dous tormenté ;
La dame n’i miht une sa pensé,
Ne ama le^[1] clerk si en Deu nun.
120Li clerk par fine foleisun
Ama tant ke il enmaladi :
Sa colur, sa beauté perdi.
De la pucele vus puis dire
Que ele entra en tel martire^[2]
125Por le clerk, kar forment l’amat,
Por poi ke sun sen ne chaungat^[3] ;
De fine aunguisse^[4] enmaladi.
Poi manga e meins dormi,
Perdi sa^[5] force e sa colur.
130Le clerk ne sot de cele^[6] amur,
Mès por la dame languisseit ;
E la dame rien ne saveit,
Kar n’ot cure de tel amur.
Ne amoit autre ke son seignur.
135Le clerk ne pout plus endurer :
Tant fu fiebles ne pout aler ;
Contre son^[7] lit ala coucher,
Lessa le beivre et le manger.

1. 119 — * le ; ms., li.
2. 124 — * martire ; ms., matire.
3. 126 — * chaungat ; ms., rechaungat.
4. 127 — * fine aunguisse ; ms., fin aunguisse est.
5. 129 — « sa » manque les deux fois.
6. 130 — * ne sot de cele ; ms., ne savait de cel.
7. 137 — « son » manque au ms.