Car je conoi bien vo parentes,
Les chaitives et les dolentes,
Et vos serors et vos aintains
Ki toutes sont ordes putains ;
Et ne fu cele vo cusine,
Et tante fois a jut sovine
Ki out .XIIII. enfans d’un prestre ?
Vos ne deveiz mie[1] bons estre. »
A ce mot li preudons li saut ;
Ilh ne dist mie : « Dex vos saut »,
Ains le saisi par ses linbars,
Se li done des esclubars ;
Tant li promet et tant li done
Ke tous ses dis li gueredone.
Cant ilh l’en ot doneit asseis,
Tant qu’il fu sus, lens et lassés,
La dame en sa chambre se muce,
Tot sans chapel et sans amuce ;
Là suce ses couz et repose,
Et dist sovent à chief de pose :
« Leres, con vos.m’aveis traïe !
Or m’a Dieu la mort otroïe,
Et si me mete en tele voie
Où je l’ame mon sangnour voie,
Et ke la moie le porsiuue
Et k’ele soit avec la siuue ! »
A tant defent l’uis à ovrir,
Et si se fait bien chaut covrir.
Si[2] fait faire des chaudelès,
Des restons et des wastelès ;
Page:Montaiglon - Recueil général et complet des fabliaux des 13e et 14e siècles, tome II.djvu/226
Le texte de cette page a été corrigé et est conforme au fac-similé.
212
470
fabliau xlix
