Li rendera tout erraument,
Ja ne devra[1] plus longement ;
Et chiex li preste[2] les deniers,
Ki voit bien k’il en est mestiers.
Or a acaté li dansiaus
Ses affichés et ses juiaus,
Pour la joie k’il se marie
Et pour ce ke il[3] prent s’amie.
Ceroit[4] fait k’il l’a espousée ;
Adont ont[5] fait lor destinée.
On les revida l’endemain ;
On lor aporta vin et pain ;
De deniers lor aport’on pau,
N’en eurent pas jusque .VIII. saus.
Font les commères, qui là sont :
« De cest premier avoir, k’il ont,
Chou est boine estrine nouvelle,
S’en acatent pot et paiele ;
Che doit on faire du premier
Que Dix leur doinst eür de bien. »
On leur aporte pute estrine,
.I. pourcelet et .II. gelines.
Par chou perdront il[6] leur cambrel
Que leur parens leur a presté :
Li pourcelès i va fouant.
Les[7] gelines i vont gratant ;
Li boine femme les encache[8],
Si les hue et si les manache ;
Si leur dist tout appertement,
Et auques mout crueusement,
Page:Montaiglon - Recueil général et complet des fabliaux des 13e et 14e siècles, tome II.djvu/181
Le texte de cette page a été corrigé et est conforme au fac-similé.
320
167
du vallet qui se met a malaise