Page:Montaiglon - Recueil général et complet des fabliaux des 13e et 14e siècles, tome II.djvu/101

1250

87

du prestre et du chevalier

Je cuit, achaterés moult chier.
Levés tost sus, alés couchier
Avoec le Chevalier gentil.
S’enchargerés anuit .I. fil.
1225Se Diu plait et sainte Esperite.
— Dame Avinée, tel merite, »
Fait li Prestres, « doi-ge recoivre ?
— Comment ? » fait-elle. « Ne doit boire
Le vin malvais^[1] qui tel le brasse ?
1230Or avés-vous si grant amasse
Anuit pour vostre grant despense. »
Et li Provoires se pourpense
C’au Chevalier donra .X. livres.
Ains que de li ne soit delivres.
1235Itele est la pensée au Prestre,
Et, se du plait pooit^[2] fors estre,
Moult li seroit avenu bien.
A cel Seignor, qui toute rien
Fist et forma, veue^[3] et promet,
1240Se Jhesu en boine le met^[4].
Que tousjours mais herbergera
Et ses osteus connus sera
Pour l’amour Diu et par frankisse,
Si que jà riens n’en sera pire
1245De despense qui laiens soit.
Ensi jure che qu’il pensoit
Li Provoires pour quites estre.
Dont dist li Escuiers^[5] au Prestre :
« Venés vous en sans delaiier. »
1250Dist li Prestres à l’Escuier :

1. 1229 — malveis, lisez malvais.
2. 1236 — povoit, lisez pooit.
3. 1239 — * veue ; ms., veu.
4. 1240 — * le met ; ms., me ment.
5. 1248 — * escuiers ; ms., chevaliers.