De genz engingnier et sousprendre. »
Par les prestres vous vueil aprendre
Que folie est de covoitier
Autrui fame, ne acointier :
Ceste résons[1] est bien aperte.
Cuidiez-vous por nule poverte
Que preude fame se descorge ?
Nenil, ainz se leroit la gorge
Soier à un trenchant rasoir,
Qu’ele féist jà por avoir
Chose dont ses sire éust blasme.
Cil ne furent mie de basme
Enbaussemé à l’enfouir,
Qui Yfame voudrent honir,
Ainz furent paie à lor droit.
Cis fabliaus moustre en bon endroit,
Qui enseigne à chascun provoire
Que il se gardent bien de boire
A tel hanap comme cil burent.
Qui par lor fol sens ocis furent,
Et par lor grant maléurté.
Vous avez moult bien escouté
Comme il furent en terre mis.
Au mengier s’assist Estormis ;
Assez but et assez menja ;
Après mengier l’acompaingna
Jehans ses oncles à son bien.
Mès je ne sai mie combien
Il furent puis se di ensamble ;
- ↑ 418 et 595 — reson, lisez resons.