[1]
Sist au mengier la matinée[2],
Et puis au souper la vesprée[3].
Et li avugle du solier
Furent servi com chevalier ;
Chascuns grant paticle[4] menoit,
L’uns à l’autre le vin donoit[5] ;
« Tien, je t’en doing ; après m’en[6] done ;
Cis crut sor[7] une vingne bone. «
Ne cuidiez pas qu’il lor[8] anuit.
Ainsi jusqu’à la[9] mienuit
Furent en solaz sanz dangier.
Li lit sont fet, si vont couchier
Jusqu’au demain qu’il[10] fu bele eure ;
Et li clers tout adès demeure,
Por ce qu’il[11] veut savoir lor fin.
Et l’ostes fu[12] levéz matin
Et son vallet, puis si contèrent[13]
Combien char et poisson coustèrent :
Dist li vallés : « En vérité[14],
Li pains, li vins et li pasté
Ont bien cousté plus de .X. saus ;
Tant ont il bien eu entre aus[15].
Li clers en a .V. sols pour[16] lui.
— De lui[17] ne puis avoir anui ;
Va là sus, si me fai paier. »
Et li vallés sanz delaier[18]
Vint aus[19] avugles, si lor dist
Que chascuns errant[20] se vestit,
Ses sires veut estre paiez.
- ↑ 110 — moult hautement. B, cortoisement. — C, Sist avoec l’oste courtoisement.
- ↑ 111 — C, Au digner le matinée.
- ↑ 112 — au souper. B, après à la. — C, Puis au souper à la vesprée, leçon qu’il faut adopter.
- ↑ 115 — paticle. C, particle.
- ↑ 116 — B, Li .I. à l’autre vin donoit.
- ↑ 117 — après m’en. B, et tu me.
- ↑ 118 — Cis crut sor. B, Cil crut en.
- ↑ 119 — qu’il lor. B, que lor.
- ↑ 120 — Ainsi jusqu’à la. B, C, Ensis jusques à.
- ↑ 123 — Jusqu’au demain qu’il. B, Jusc’à demain qu’i.
- ↑ 125 — qu’il. B, que.
- ↑ 126 — Et l’ostes fu. B, Li ostes est. C, Li ostes ert.
- ↑ 127 — B, Et ses sergens, et si conterent.
- ↑ 129 — B, C, Li vallez dist : « En charité.
- ↑ 132 — B, Si m’aït Diex et saint Thiebaut !
- ↑ 133 — sols pour. B, tot pour. C, à par.
- ↑ 134 — De lui. B, A lui.
- ↑ 136 — C, Et chius i vait sans delaiier.
- ↑ 137 — Vint aus. C, Droit as.
- ↑ 138 — chascuns errant. B, tantost chacuns.