conquestes de l’empereur Charlemaine n’est point parlé du duc Droon, pere de icelluy duc Gerard, j’ay eu plusieurs debats en moy, et, tout debatu et consideré, je suis mieulx d’oppinion que ces choses advindrent du temps de Charles Martel que au temps de Charles le Chaulf. Neantmains, de tout ce et de toutes autres choses, je me rapporte (fol. l) en la correction de ceulx quy prendront la paine d’en sçavoir la verité, et requiers aux lisans que se en mon euvre ilz treuvent chose ou il y ait a reprendre, qu’ilz le vueillent corrigier en excusant mon ygnorance, priant a Jhesucrist, filz de la trés glorieuse vierge, qu’il doinst a tous loiaulx princes chrestiens tellement gouverner leurs subgets, qu’il leur puist redonder a gloire et a loenges, et en la fin soient herbegiés en la mansion eternelle, amen, en laquelle nous maine le Pere, le Filz et le Saint Esperit. Amen.
Cy fine le proheme et histoire des haulz et vertueulz loables et puissans fais du noble duc et conte de Bourgoingne, monseigneur Gerard de Ronssillon.
