Cette page n’a pas encore été corrigée
Elle ne sçauroit retenir
L’insupportable souvenir
Du fier tyran qui la possède,
Si bien que vivant en langueur
Ailleurs qu’en son fâcheux vainqueur
Elle va cherchant son remède.
Polemandre alors repartit,
Pourquoy elle ne consentit
De suivre les loix d’Hyménée
Avec Lyridan qu’elle aimoit,
(car il est vray qu’il l’enflammoit
Par une ardeur sainctement née).
Lors Phildor respondit ainsi :
– bien qu’alors il fust son soucy,
Son âme et sa plus douce vie,
Si maintenant il lui desplait,
Voire mesme plus que ne fait
La mort des hommes ennemie,
Voudrois-tu forcer son vouloir ?
Force qui la feroit douloir
Comme la triste tourterelle,
Qui d’une pitoyable voix
Essourde les monts et les bois
Plaignant sa compagne fidelle.
