Cette page n’a pas encore été corrigée
Et tu es tousjours un rocher
D’où mon dueil ne peut approcher,
Insensible aux douces atteintes
Dont amour m’a blessé le cœur,
Et semble, hélas ! Que ta rigueur
Se paisse du son de mes plaintes.
Ay-je trop peu de fermeté ?
Ma face est-elle de beauté
Et d’attraicts si fort despourveuë,
Qu’elle ne puisse t’embraser
Du feu dont tu sçais m’attiser
Par le doux rayon de ta veuë ?
Mille soubs le joug de ma loy
Se sont venus plaindre de moy
Qui desdaignois leur sacrifice ;
Mais leur importune amitié
N’a peu me touchant de pitié
Me rendre à leur désir propice.
Mesme celuy à qui le sort
M’assemble d’un contraire effort
Ne me fut jamais agréable :
Toy seul as paru à mes yeux
Ainsi qu’un soleil gracieux
Seul entre les mortels aimable.
