Le texte de cette page a été corrigé et est conforme au fac-similé.
XII
Le gallant avoit pour habit
Longue robe noire, dessainte
Comme pour estre a ung obit,
Cornette de beau veloux, tainte
En couleur de reffus et plainte,
Cheveux longs du temps des apostres,
Et puis par devocion fainte
Portoit les belles patenostres.
XIII
Quant je me fus agenoullé
Et que euz commencé ma priére,
De cet homme me esmerveillé
Qui menoit sy piteuse chiére,
Car a ung lieu n’arestoit guére,
Ains toujours venoit et alloit,
Et sembloit bien a sa maniére
Que du monde ne luy challoit.
XIV
En me pourmenant au travers
De la nef, et a l’opposite,
Ung des religieux convers
Vint donner a tous l’eau beniste ;
Puis que la grant messe fut dicte,
Veis la venir damp Procureur
Portant un visage d’ermite,
Qui fist a l’Amant grant honneur.