Or sur ce point est a noter
Que, de tous vivans langoureux,
L’on n’eust leens souffert bouter
Sy non les loyaulx doloreux,
Les despourveux adventureux,
Les désolez et espanis,
Mesmement povres amoureux.
Qui de leurs dames sont banis.
De la nef, du cueur, du portal
Ne sauroye pas au long toucher ;
Tous les murs estoient de cristal,
Tout lambroussez jusque au clochier
De fin or et d’azur mout chier,
Et la croisée toute d’ivire ;
Brief, qui vouldroit tout espluchier
Il faudroit ung jour a le dire.
Sy veis, en entrant a l’eglise,
Un povre amant plourer sy fort,
Portant le noir et sans devise
Comme tout plain de desconfort ;
Triste estoit lors jusque a la mort
Com s’il vouloit pencer de l’ame,
Et disoit l’en leens qu’a tort
L’on l’avoit bany de sa dame.