Ce lieu divin, qu'aux humains bien sembloit
Que terre au ciel de beaulté ressembloit:
Si que le cueur me dit par previdence
Celluy manoir estre la residence
De ferme Amour, que je queroye alors.
Parquoy voyant de ce lieu le dehors
Estre si beau, espoir m'admonnesta
De poursuivir, et mon corps transporta
(Pour rencontrer ce que mon cueur poursuit)
Pres de ce lieu basty, comme s'ensuit.
[Description du Temple de Cupido]
Ce Temple estoit, ung clos flory Verger
Passant en tout le Val delicieux,
Auquel jadis Pâris jeune Berger
Pria d'amours Pegasis aux beaux yeulx:
Car bien sembloit que du plus hault des Cieulx
Juppiter fust venu au mortel estre,
Pour le construire, et le faire tel estre,
Tant reluisoit en exquise beaulté.
Brief on l'eust pris pour Paradis terrestre,
S'Eve, et Adam dedans eussent esté.
Pour ses armes Amour cuysant
Porte de gueules à deux traictz:
Dont l'ung ferré d'or tresluisant
Cause les amoureux attraictz:
L'aultre dangereux plus que traictz,
Porte ung fer de plomb mal couché,
Par la pointe tout rebouché,
Et rend l'amour des cueurs estaincte,
De l'un fut Apollo touché:
Page:Marot - Les œuvres de Clément Marot, de Cahors, valet de chambre du roy, 1547.djvu/37
Cette page n’a pas encore été corrigée
