Car de pecune ung peu ma bourse est tendre,
Et toutesfoys j'en ay, vaille que vaille,
Ung bien petit.
Mais à vous veoir (ou l'on me puisse pendre)
Il semble advis qu'on ne vous vueille rendre,
Ce qu'on vous doibt: beau Sire ne vous chaille.
Quand je seray plus garny de cliquaille,
Vous en aurez: mais il vous fault attendre
Ung bien petit.
III
Du Disciple soustenant son Maistre contre les Detracteurs
Du premier coup, entendez ma response
Folz Detracteurs, mon Maistre vous annonce
Par moy, qui suis l'un de ses Clercs nouveaulx,
Que pour rimer ne vous craint deux Naveaulx,
Et eussiez vous de sens encor une once.
Si l'espargnez, tous deux je vous renonce:
Picquez le donc mieulx que d'Espine, ou Ronce,
Luy envoyant des meilleurs, et plus beaulx
Du premier coup.
Et tenez bon, ensuyvant ma semonce,
Car si ung coup ses deux Sourcilz il fronce,
Et eussiez-vous de Rimes, et Rondeaulx
Plein trois Barrilz, voire quatre Tonneaulx,
Je veulx mourir, s'il ne les vous deffonce
Du premier coup.
IV
De celluy, qui incite une jeune Dame à faire Amy
A mon plaisir vous faictes feu, et basme,
Parquoy souvent je m'estonne ma Dame,
