Cette page n’a pas encore été corrigée
Es tu de si peu de deffense,
Si couard, et si baboyn,
De n’oser parler que de loing ?
L’epistre venue de moy
Pour femme, qui vault mieulx que toy,
N’est aultre cas que une risée,
Ou personne n’est desprisée.
Mais toy lourdault mal entendu
En ta response m’as rendu
Pour une risée une injure.
Si je te congnoissois (j’en jure)
Tu sentirois, si mes Lardons
Ressemblent Roses, ou Chardons.
Pour vn gentil homme de la Cour escripuant aux dames de Chasteaudun
(De la Suyte)
D’un cueur entier, Dames de grand value,
Par cest Escript vostre Amy vous salue,
Bien loing de voüs : et grandement se deult,
Que de plus pres saluer ne vous peult.
Car le record de voz grandes beaultez,
Le souvenir des doulces privaultez,
Qui sont en vous soubz honneste recueil,
