Cette page n’a pas encore été corrigée
Je vouldroys voulentiers m’enquerre,
S’il est parent de mon Valet.
Si je congnoissois le Follet,
Je produiroys en mon Rollet
De sa vie assez de Tesmoings.
Quel qu’il soit, il n’est point Poëte,
Mais Filz aisné d’une Chouette,
Ou aussi Larron pour le moins.
Pinseur pinsant, entre aultres poinctz
Je t’ai pinsé de ce mot, pinse :
Les Bons n’y sont pinsez, ny poinctz,
Mais les Meschans, dont tu es Prince.
Au lieutenant Gontier
(De l’Adolescence)
Si Maladie au visaige blesmy
N’eust perturbé le sens à ton Amy,
Long temps y a (Gontier) que ta semonce
Eust eu de moy la presente response,
Qui ne debvroit response se nommer.
