Cum il passa séurement
Dunc crient tant hideusement
Que li eirs remut è la terre
Greignor péril n’estoveit querre ;
Gréïgneur pour out de ces criz
Que des périlz k’il out sentiz,
Autres Diables vit parfunt
Qui jetouent lur crocs, à-munt,
De fer ke croker le voloient,
Mès à lui toucher ne poeient ;
Outre le pont délivrement
Passa puis senz encombrement.
Li Autors nus fet ci entendre
Que nus devum essample prendre
Des grant turmenz k’avez oï
Dont li Livres nus cunte ci,
E des miseries que ci sunt
E des granz peines de cest munt.
Si ces peines estéïent mises
Contre les autres, è assises,
Ni aureit-il comparisun
Plus de Egle è del Pinçun.
Teus sunt les peines enfernaus
E les méseises, è les maus
Que nuls nès porreit anumbrer
Plus ke gravele de la mer.
Page:Marie de France - Poésies, éd. Roquefort, II, 1820.djvu/477
Le texte de cette page a été corrigé et est conforme au fac-similé.
465
DE MARIE DE FRANCE.
