Le texte de cette page a été corrigé et est conforme au fac-similé.
432
POÉSIES
L’Eveskes oït ço k’il dist
E coment il se régéhist :
Mult le blasma k’il out esté
En tel ovre è demoré ;
Par ses péchiez out irascu
Sun Créatur et offendu.
Li Chevaliers pur ses péchiez
Fud mult tristes è esmaiez ;
Pense ke digne pénitence
Fera solum la Deu-consence.
L’Eveskes li voleit doner
Solum ço k’il l’oït parler
Pénitence de ses péchiez
Dunt il pust estre alégiez ;
Li Chevaliers lui dist brefment :
Sire Eveske, n’en voil néent
E légièrement espenir,
Ne tel pénitence suffrir ;
Trop ai forfait à mun Seignur,
E offendu mun Créatur.
Por ço eslis, par Deu licence,
La plus griève pénitence ;
Al Espurgatoire en irrai
Seint Patriz, è là enterai
Ke jo seie de mes péchiez
E délivres è espurgiez.
Li Eveskes l’amonesta
