Fors sul le Cevalier dormant.
Pâle le vit, mort le cuida,
Arestut soi, si l’esgarda ;
Arière vait la Dameisele,
Hastivement sa Dame apele[1],
Tute la vérité li dit,
Mut pleint le mort que ele vit.
La Dame dist : Or’i aluns[2]
Et s’il est mors, nus l’enfouïruns ;
Nostre Prestres nus aidera,
Se il est vis, si parlera[3].
Ensanble i vunt ne targent mès,
La Dame avant è cele après,
Quant ele est en la neif entrée,
Devant le lit est arestée,
Le Cevalier a esgardé,
Mut pleint sun cors et sa biauté ;
Pur lui esteit triste è dolente
Et puis dist : Mar fu sa juvente,
Desor le pis li mist sa main,
Caut le senti et le quer sain,
Ki sous le costé li bateit.
Li Chevaliers qui se dormeit
S’est esveilliés ; si l’ad véue,
Mut très ducement la salue[4] ;
Bien seit k’il est venus à rive.
La Dame plurante è pensive
Li respundi mult boinement,
Page:Marie de France - Poésies, éd. Roquefort, I, 1820.djvu/86
Cette page a été validée par deux contributeurs.
70
LAI DE GUGEMER.
