En nul réaulme n’out plus bel :
A merveille l’amot sa mère,
E mult esteit bien de sun père.
Quant il le pout partir de sei,
Si l’envéat servir le Rei :
Li Vadlet fu sages è pruz,
Si se faseit amer de tuz.
Quant fu venus termes è tens,
K’il ot assés éage è sens,
Li Reis l’adouba ricement,
Armes li dune à sun talent.
Gugemers se part de la Curt,
Mult i dona ainz qu’il s’enturt :
En Flaundres vait pur sun pris querre,
Là out tusjurz estrif è guerre.
En Loreine, ne en Burguine,
Ne en Angwe, ne en Gascuine,
A cel tens ne pot-hum truver
Meillor cevalier ne sun per :
De tant i ot mespris nature,
Ke unc de nul amur n’out cure,
Sous ciel n’out dame ne pucele,
Ki tant fu avenans et bele ;[1]
- ↑
Qui tant par fust noble ne bele,
Se il de amer la requist.
