Cette page a été validée par deux contributeurs.
574
LAI DE L’ESPINE.
Et tous-jors l’aroit cras et biel,
Ainc-mais ne veistes plus isniel ;
Mais ne soiés ja esbahis,
Por cho qu’estes preus et hardis,
Puisque le frain l’aurois tolu,
Isnelement l’aurois perdu.
Li Damoisiax ot et entent
Qu’il parole raisnablement ;
Et se c’est voirs que li destine
Aler en wet à la Meschine.
Mais primes wet à lui joster
Plus biel pora de lui sevrer
Avec les armes prent le regne
Et prent une lanche de fraisne
Eslongiés s’est del’ Chevalier
Et prendent le cors el gravier.
Por asanbler ensanble poignent,
Les lances baissent et eslongnent ;
Desor les escus à argent
S’entrefièrent si fièrement.
Que tous les ont frais et fendus,
Mais les estriers n’ont pas perdus.
Et qant se sont si bien tenu
Si l’a le Damoisiaus feru
